2017年4月16日星期日

[草菇炆豆腐]


又嚟素一素先....呢碟草菇炆豆腐又係我至愛,煮親呢碟餸....我就一定要煲多啲飯,而煮呢個餸我會用硬豆腐,煮完都唔怕豆腐散哂,又靚仔又好味有冇人都鍾意呢個小炒呢?? ~^^~

材料:
硬豆腐 1盒
草菇 8-10粒
蒜蓉 1湯匙
醬汁:
素蠔油 2湯匙
糖 1茶匙
做法:
1. 燒熱一鍋水,將草菇汆水,備用。
2. 硬豆腐切大粒,備用。
3. 燒熱油鍋,將蒜爆香後加入草菇炒一會。
4. 加入豆腐一同拌炒。
5. 加入調味料拌勻,加入蔥花即可。


video
溫馨提示:
- 將草菇汆水可去除草青味。
- 宜選用硬豆腐。

[Bruno食譜-- Holiday Brunch]


終於都放假喇...真係巧開針....假期開始第一個早餐,梗係要食得開懷暢快啲啦,見早兩日買咗包韓式香腸拼盤,入面有唔同嘅口味,分別有蜜糖腸、咖哩腸、香草腸、黑椒腸及芝士腸,一包有齊咁多款腸,真係幾好架...有時將啲食物菜式擺得靚靚哋,真係人都開心啲...你哋又鍾唔鍾意呢?? ~^^~

[美顏夜宵 -- 紫薯薑糖湯丸]


仲有兩日先放假,但我已經進入放假狀態....唔捨得訓喇.....HEHE....見餓餓哋....咪整個夜宵嚟氹下自己啦....個甜品係用咗薑糖嚟做湯底,紫薯煲完又香又「林」,顏色仲好令仔,再配埋個芝麻湯丸.....真係巧巧味呀........都係果句啦.....肥屎人冇命賠呀~^^~

[快手系列 -- 煙肉碎炒蛋]

呢排做嘢做到人都顛,放咗工只係想快啲返屋企食少少嘢就上床休息喇,今晚就煮個快手飯,用咗煙肉碎嚟炒蛋...而家坊間有啲煙肉碎一盒盒,細細盒,已經切好哂,一打開就已經用得,真係好方便。咁我就用佢嚟炒蛋,加埋蔥花,就已經好過出街食喇...有冇人都鍾意食炒蛋呢~^^~
材料:
雞蛋 3隻
牛奶 50ml
煙肉碎 約3-4湯匙
蔥花 少許
做法:
1. 先將雞蛋與牛奶拌勻。
2. 加入煙肉及少許鹽拌勻。
3. 大火燒熱油鍋,將雞蛋糊加入。
4. 炒至微微凝固時,再翻動其他蛋糊。
5. 炒至8成熟,灑上蔥花即可。
溫馨提示:
- 可按個人口味改用蟹柳、蝦仁、黑松露、洋蔥或櫻花蝦。
- 炒蛋須用較多油份。

[Bruno食譜--簡易韓式牛仔骨]

呢個牛仔骨簡單易做,用咗韓式醬汁嚟醃肉,多咗一份生果甘香,惹味至極,只要加入洋葱一齊醃,能令肉質非常滑溜又煙韌,肉汁多又甘香,真係可以地獄廚神都彈返上地面呀....係咪好方便呢?快啲試試啦...~^^~
材料:
牛仔骨 1磅
洋蔥 1個(切絲)
芝麻 1湯匙
醃料:
韓式牛肉醃汁 4湯匙
麻油 1湯匙
做法:
1. 將所以材料與醃料拌勻,至少醃2小時。
2. 燒熱油鍋,先將牛仔骨煎至半熟。
3. 再將所有醃汁及洋蔥回鍋。
4. 將牛仔骨炒至熟後,灑上芝麻即可。
溫馨提示:
- 可按個人口味而選用紫洋蔥,味道會較清甜。
- 可按個人口味加入韓式辣醬來醃肉。

video

[Bruno食譜 -- 士多啤梨果醬]

呢個果醬用bruno嚟整,真係又快又方便,追求無添加、愛健康嘅朋友仔,呢個真係要試試喇,mmmmm~~~下次整咩味道好呢?! ~^^~
材料:
士多啤梨 2盒 
啡糖 80克 (可用砂糖代替)
檸檬汁 半個
做法:
1. 士多啤梨洗淨,抹乾,去蒂切半,加入砂糖及檸檬汁拌勻,醃最少4小時或過夜。
2. 電鍋放上深鍋,以MED預熱約4分鐘。
3. 將所有材料倒入鍋中,將士多啤梨煮15分鐘或至厚身。
4. 在雪櫃取出凍碟子,滴下少許果醬測試凝固點,如用手指在果醬上能畫出一條清晰的界線便成。
5. 關機,趁熱將果醬注入已消毒的玻璃樽內。
6. 果醬要立刻上好蓋,倒轉放置直至冷卻。
溫馨提示:
- 烹煮果醬其間要不停地攪拌。
- 蓋子成真空狀況後(中間凹下),放入雪櫃儲存。
- 一般可保存6個月,開封後要放雪櫃,並盡快吃完。
video

[🍔未來漢堡 -- Beyond Burger🍔]

多謝謝 Green Common邀請,今晚終於可以試食期待咗好耐嘅未來漢堡喇!! 但食完...我O咗咀呀....個頭好多個問號..... 點解嘅😆.....點解嘅😆....點解嘅😆??!!! 呢個有牛肉香味...又有牛肉口感....咬落仲好Juicy嘅....真係唔係牛肉漢堡😋?!唔係掛....佢嘅質感同味道,同真肉又冇分別喎....唔通....呢個係幻覺😉??!!!
原來呢個漢堡入面係beyond meat,佢加入咗紅菜頭及青豆,中間更用椰子油仿製成肉汁,漢堡扒鮮嫩嘅紅色,其實係加咗紅菜頭,而響加熱烹煮嘅過程中,漢堡扒會慢慢變得深色,模仿出真正變熟嘅狀態,煎好後香氣十足,令人食指大動😋。追求健康又愛環保嘅朋友仔,呢個漢堡真係冇得輸🍔,大家都快啲去試試啦....信我....冇呃你哋!!! ~^^~







video